إستراتيجية بناء باك لينك شرعي 100%

إستراتيجية بناء باك لينك شرعي 100% ،، في بعض الأشخاص بدأوا يرددو إشاعات كثيرة إن الباك لينك ملوش قيمة وأصبح من الماضي أحب أوجه ليهم رسالة صغيرة وبسيطة  كلامكم خاطئ 100% الباك لينك له قيمة وهيفضل له قيمة بجانب توافر محتوى مفيد وشامل وبيقدم الإفادة الكاملة للزائر وشرحنا قبل كده طريقة كتابة محتوى متوافق مع السيو وبرضه مش هننسى نأكد كلامنا تاني لو مفيش محتوى قوى وبيقدم إفادة كاملة يبقى الباك لينك ملوش أي لازمة ولكن مع وجود محتوى جيد وشامل في حالة واحدة بس يكون فيها الباك لينك قيم وقوى .

الحصول علي باك لينك شرعي :

للحصول علي باك لينك لازم جوجل يبقى متأكد 100% إنه باك لينك شرعي تماماً وكمان إن محتواه جيد وفوق كل ده يكون في نفس تخصص موقعك بمعني مجيش اعمل باك لينك في مقال بيتكلم عن الأزياء والموضة لموقع بيتكلم عن كرة القدم ومينفعش أجي أعمل باك لينك بدون ماكون قدمت إفادة للزائر إللي هيقراه تعليقي أو مقالي اللي عن طريقه قدرت أخد باك لينك من موقع ما وكمان يمنفعش أعمل باك لينك لصفحة ما او مقال ما مبيقدمش إفادة كاملة للزائر لأن ساعتها مهما عملت باك لينك هيفضل مقالي متراجع لأن الزائر بيخش المقال وميلاقيش الإفادة فايخرج علطول وبعدين يخش نتايج تانية وبالتالي حتي لو وصلت إني ابقى رقم 1 في كلمة مستهدفة هتراجع بسهولة جداً وفي وقت قصير جداً ويكاد يكون نفس اليوم بمجرد مالـ bounce rate بتاعي يبقى سئ وده معناه إن مقالي غير مؤهل أنه يبقى مصدر جذب الزوار .

الحصول علي باك لينك من أدلة المواقع :

في بعض الأشخاص مؤخراً بقت بتردد شائعات كتيرة وهي إن أدلة المواقع أصبحت ملهاش أي لازمة ومش مفيدة بالمرة أحب برضه أبلغكم إن كلامكم خاطئ بنسبة كبيرة جداً أدلة المواقع مازالت قوية ومازالت بتفيد المواقع اللي بتضاف فيها ولكن يجب أن نراعي الأتي :

1. فحص دليل المواقع اللي انت عايز تضيف فيه موقعك بنسبة 100% إتأكد أنه مش عبارة عن دليل مواقع لتبادل الروابط أو لبيع الروابط بداخل صفحاته .
2. إتأكد أنه مؤرشف في جوجل وكمان إتأكد انه خالي من الإسبام سكور وده نادراً مابنلاقيه بس اللي بيدور هيلاقي كتير .
3. إتأكد أنه دليل مواقع قديم ومازال محافظ علي ترتيبه في جوجل او علي تواجده .
4. وانت بتضيف موقعك إتأكد أنك بتضيف في القسم الصحيح .
5. اتأكد إنك بتضيف موقعك في دليل مواقع بنفس لغة موقعك يعني مينفعش يبقى موقعي عربي واضيفه في دليل هندي مثلا .

عن تجربة أدلة المواقع مفيدة بنسبة كبيرة وفي السابق كانت كافية للسيطرة علي كلمة مفتاحية معينة وكانت محببة لجوجل بنسبة كبيرة ومازالت لها قيمة ولكن ليس كالسابق ولكن مهمة .

الحصول علي باك لينك عن طريق التعليقات :

لو حضرتك ناوي تعمل كومنت أو تعليق في موقع ما وتجيب منه باك لينك يبقى لازم تاخد بالك من النقاط التالية :

1. أولا لازم يبقى المقال اللي هتعمل فيه كومنت وتجيب منه باك لينك يكون لنفس المحتوي اللي هتعمله باك لينك .
2. ميكونش فيه روابط باك لينك لمواقع تانية كتيرة .
3. متجبش باك لينك بكلمة مفتاحة بس سيب رابط مقالك .
4. متهتمش دو فولوا ولا نو فولوا الإتنين مفيدين .
5. لازم تقدم إفادة مقدمهاش كاتب المقال وبيبحث عنها الزائر وتكون متوفرة في مقالك ولكن وانت بتكتبها متاخدهاش كوبي صيغها بشكل جديد .
6. إياك وتكرار الكومنت اللي هتعمله في مواقع مختلفة كل مرة تعمل كومنت قدم إفادة مختلفة وقوية وخد منها باك لينك براحتك .

الحصول علي باك لينك من المنتديات :

برضه في ناس بدأت تقول إن الباك لينك في المنتديات ملوش قيمة أحب اقولكم كلامكم خاطئ بنسبة 100% .. أي باك لينك في أي صفحة له قيمة إذا توافرت فيه الشروط الأتية :

1. يكون الموقع او المنتدي متوافق مع محركات البحث علي الاقل بنسبة 70% .
2. يكون غير ممتلئ بمقالات سبام بدون نشر الإفادة .
3. يكون غير معاقب من جوجل أو مخالف .
4. يكون محتواه او محتوى القسم اللي هتاخد منه باك لينك او محتوي المقال اللي هتاخد منه باك لينك متوافق مع محتوى مقالك اللي هتعمله الباك لينك .
5. وانت بتاخد باك لينك إبعد عن الردود أعمل موضوع جديد وقدم فيه إفادة قوية ومحترمة كأنك بتعمل مقال لموقعك نفسه بحيث أنه يقدر ينافس بنسبة بسيطة في محركات البحث ولما تاخد منه باك لينك يكون بيديلك إفادة قوية .

الحصول علي الباك لينك من مواقع صديقة ( الجيست بوست ) :

في حالة توافر شرائك لباك لينك في موقع نفس محتوى موقعك كـ جيست بوست أو تبادل الروابط كـ جيست بوست يجب إتباع الأتي :

1. لا تقوم نهائياً بعمل جيست بوست في موقع ما أي كتابة مقال في هذا الموقع وأخذ منه باك لينك لمقالك او موقعك وبعد كده تقوم مديله باك لينك من نفس الموقع أو المقال ده أمر سئ جداً قم بتبادل الروابط مع الموقع ولكن من خلال موقع تاني مختلف عن موقعك اللي عايز تبنيله باك لينك شرعي .
2. عند شرائك أو القيام بتبادل الجيست بوست قم بتقديم إفادة كبيرة بمحتوي حصري غير مكرر وحاول أن تقوم بتحديثه كل فترة .

الحصول علي الباك لينك بإستراتيجية الويب 2

تلك الطريقة أقوى طرق الحصول علي الباك لينك وهقوم بشرحها تفصيلياً في مقال تاني بكل الطرق الناجحة اللي بنستخدمها في مواقع الـ WEB 2.0 .